Sámediggepresideanta árvvoštallá áššáskuhttit stáhta
Sámedikki presideanta oaivvilda ahte Muolkkut-mearrádus ii leat gustovaš, ja árvvoštallá cegget ášši stáhta vuostá. Dál son árvvoštallá áššáskuhttit stáhta.
– Lea stuorra ášši mii buvttiha midjiide hui ollu hástalusaid areáladuohtademiid dáfus. Dat mielddisbuktá maiddái ollu eahpesihkarvuođa. Ii leat eará vuohki bissehit ášši, dadjá sámediggepresideanta, Silje Karine Muotka.
Geassemánus son ja sámediggeráđđi váldet ášši viidáseappot ja bivdet Sámedikki dievasčoahkkima viiddidit fápmudusaid.
Son oaivvilda ahte Sámediggi ferte árvvoštallat lea go dárbu cegget ášši stáhta vuostá Muolkkuid elektrifiserema oktavuođas.
– Dat ii leat dábálaš. Ja dát ášši ge ii leat dábálaš, deattuha Muotka.
Energiijadepartemeanta čuoččuha gis sin bealis ahte Sámediggi lea gulaskuddojuvvon áššis.
– Go mii meannudat ohcamiid ođđa el-fámu ja ođđa neahta oktavuođas, de mii gulaskuddat Sámedikkiin dan birra, dadjá stáhtačálli energiijadepartemeanttas, Elisabeth Sæther NRK:ii.
Son váldá vuostá ođđasa ahte Sámediggi árvvoštallá áššáskuhttit stáhta.
– Jáhkán ahte galggan leahkit várrogas karakteriseremiin dán justa dál. Mun válddán vuhtii ahte Sámedikki presideanta dál árvvoštallá ovddidit dakkár ášši dievasčoahkkimii, ja mii han oaidnit mo šaddá, lohká Sæther.