Oaččui oahppoduođaštusa: – Mun lean nu ilolaš
Dál fargga besset studeanttat návddašit geasseluomu, muhto dan ovdal ávvudit máŋggain sajiin giđđafeasttaid gos studeanttat duođaštusaid ožžot.
Sámi oahpahusguovddáža Sajosis giđđafeasta lágiduvvui odne bearjadaga, ja doppe geigejuvvojedje duođaštusat earret eará gárvejuvvon giellaoahpahussii.
– Mun lean nu ilolaš, lihkolaš ja maiddái hui rámis, logai davvisámegiellastudeantta Sani Kurkinen
Son mieđiha ahte ii leat dušše álki leamašan gazzat oahpu:
– Dat lea leamaš lossat, ii leat álki oahppat áibbas ođđa giela, muhto dat lea maiddái leamašan hui miellagiddevaš ja dehálaš jahki munnje.