Soahpan duodjeealáhusšiehtadusa
Sámediggi ja duodjeorganisašuvdna Sámiid Duodji leat soahpan ođđa duodjeealáhusšiehtadusa áigodahkii 1.1.2024-31.12.2025. Bealit leat soahpan ahte ollislaš rámma boahtte guovtti jahkái lea 7,2 miljovnna ruvnno goappáge jahkái. Dan čállá Sámediggi preassadieđáhusas.
Sii čállet ahte duodjeealáhusšiehtadus lea Sámedikki deháleamos reaidu ovdánahttit duodjeealáhusa.
Seammás fátmmasta čálgoortnet maiddái duodjefitnodagaid oahpahalliid, ja dat mearkkaša ahte Sámediggi máksá buohccindieđihangoluid 1. beaivvi rájes gitta 16. beaivvi rádjái.
– Sámediggi oaivvilda ahte dát lea buorre duodjefitnodagaide, mat de eai dárbbaš máksit bálkká dán áigodaga, dadjá sámediggeráđđi Runar Myrnes Balto (NSR) preassadieđáhusas.
Son maid dadjá ahte Sámediggi háliida váldit stuorát ovddasvástádusa duodjeealáhusa ovdánahttimis, ja lea ealáhusšiehtadusas várren ruđa vai sáhttet doarjut duojáriid fitnodat- ja gávpeovdánahttima.