«Vuolláičállinriidu» ránnjágielddaid gaskka
Guovtte vahku áigge álggahuvvui vuolláičállinkampánnja oččodan dihtii ráđđehusa diktit Deanu gieldda luossabivdiid bivdit veaháš luosa iežaset gielddas dán geasi.
Dán kampánnjas leat badjelaš 100 vuolláičállaga dássái.
Dasa ii liikon kárášjohalmmái, guhte almmuhii iežas vuolláičállinkampánnja mas ávžžuha ráđđehusa doalahit Deanu gitta dán geasi.
Guktot kampánnjat leat underskrift.no neahttasiiddus.
Deatnu lea beakkán luossaeatnu sihke Norggas ja máilmmis. Dat lea leamašan oainnat okta Eurohpa buoremus luossabivdoeanuin.
Maŋimuš moadde jagi ii leat oktage beassan luosa bivdit Deanus, go luossalogut leat niedjan. Muhtimat ballet ahte dát sáhttá oalát jávkadit sámi ja Deanuleagi luossabivdoárbevieruid.