ÁRRAN 360° čajehuvvo TIFFas 2023
Čájáhus máhccá ruoktot Sápmái ja Norgga vuosttaščájálmas šaddá Romssa internašunála filbmafestiválas ođđajagimánus.
ÁRRAN 360° lea hybrida gaskkal álgoálbmot muitalusaid ja innovatiiva teknologiija. Lea vuosttaš prošeakta mii čajeha guhtta originála 360 filmma maid sámi filbmadahkkit ja dáiddárat Sámis leat ráhkadan. Čájáhusat čájehuvvojit máilmmi stuorámus lávus, mas lea 28 metera filbmašearbma, olggobealde Hålogaland Teáhtera.
– Dát lea spektakuleara prošeakta mii ovttastáhttá muitaleami ja high-techa. Lea gelddolaš seaguhus árbevieruin, go buot dáhpáhuvvá lávus, muhto ođđa teknologiijain ja ođđaágásaš muitalanvugiiguin. Mii leat duođaid hirpmástuvvan Internašunála Sámi Filbmainstituhtain ja maid sii leat oláhan ovttas filbmadahkiiguin, dadjá festivála- ja prográmmajođiheaddji Romssa Internašunála filbmafestiválas Lisa Hoen.