Doarju gáibádusa dronnegii
Fylkkaráđijođiheaddji doarju Sámedikki gáibádusa Dánmárkku dronnegii. Sámediggepresideanta Aili Keskitalo lea Dánmárkku Majestehtalaš dronnegii Margrethii čállán reivve, mas bivdá veahki Poala-Ándde meavrresgári oažžut ruoktut Sápmái, mii duoguštuvvui 1692:s.
– Dál gal lea áigi Dánmárkkus máhcahit dan maid válde dalle go Norga gulai Dánmárkui. Danin doarjjun ollásit sámediggepresideantta gáibádusa bisuhit iežamet sámi kulturártna, lohká Romssa ja Finnmárkku fylkkaráđijođiheaddji Bjørn Inge Mo.