Deanušiehtadus ii šiehtaduvvo ođđasit go Norga ii sáhte oažžut buoret šiehtadusa go mii dál lea jo. Dán dadjá Dálkkádat- ja birasdepartemeantta stáhtačálli Atle Hammer Ávvir áviisii. Deanučázádaga luossareivveeaiggádat leat stevdnemin Norgga stáhta diggái go oaivvildit, ahte Norgga ja Suoma gaskasaš šiehtadus rihkku sin vuoigatvuođaid. Stáhtačálli dadjá ahte šiehtadusa árbevirolaš bivdu lea váldon vuhtii vaikko lea ge gáržiduvvon.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.