Kárášjogas álggahuvvui dáiddaskuvlla 2011:s. Dan lea jođihan dan rájes dáiddár Eva Aira. Dál lea son heaitimin ja sadjái lea válljejuvvon ođđa rektor. Son lea govvadáiddár ja ekonoma, Ann Mari Aamot. Son lea Porsgrunna nisu ja orru dál Hársttáin. Dáiddaskuvlii lea maiddái virgáduvvon ođđa dáiddafágaoahpaheaddji, gáhttadáiddár Linda "Zina" Aslaksen. Ieš gal Aamot lohká somán álgit, muhto veháš balus maid.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.