Stuorradikki dárkkistan- ja konstitušuvnna lávdegotti jođiheaddji, Martin Kolberg, cuiggoda stáhtaráđđái dan Deanu čázádaga soahpamuša mii lea dahkkon Suomain. Lávdegoddi háliida diehtit leago lága čuvvon ja jus eai, de šaddá Stuorradiggi ođđasit gieđahallat ášši vaikke vel leage jo gieđahallan ášši.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.