Dievdu gii lei gizzumin jiekŋabávttis Gáivuonavákkis, davviromssas, šattái vizzot helikopterin go ii beassan šat gosage ikte eahket. Dievdu dáhtui ieš veahki, ja ii lean lápmašuvvan. Romssa politiijaguovlu čállá Twitteris ahte sihke alpin gádjunveahka,ambulánsahelikopter ja Sea King-helikopter ledje gádjunbáikkis. Dievdu lei akto gizzumin jiekŋabávttis, ja lei Sea-King gádjunhelikopter mii gájui olbmá ovdalaš diibmu 1800 ikte.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.