Ruoŧa beale sámi dáiddár Anders Sunna lea ráhkadeamin grafittidáidaga Álttá nuoraidskuvlla stuorrra seaidnái. Ovddádusbellodaga politihkkár Rut Olsena mielas dát dáidda ii heive mánáid ja nuoraid čalmmiide go earret eará seaidnái lea málejuvvon ráfiduvvá mas lea dynamihtta. Dat ii oro vuogas dáid ráfehis áiggiid, moaitá Olsen.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.