Vuoras almmái lea heavvanan Avviljohkii, Avvil Máhte guovllus Anáris, nu dieđihit Lappi politiijaguovllus. Heavvanan albmá gávdne lávvardaga guovtti áigge beaivet. Politiija dieđáhusa mielde de lei son vuolgán fierbmut bearjadateahket, muhto go moatte tiimma maŋŋá ii lean vel máhccan, de ohcagohte su. Nu čállá YLE sápmi.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.