Árktisa šaddodat ii leat šat nu ruonas go láve, sivvan dasa lea go ii šaddat šat nu olu ruoná lastta go ovdal. Nu čállá forskning.no neahttasiidu. Guhkes giđat ja galbma geasit goaridit Árktisa ja guovlu ránoda. Maiddái dahká heaju šattolašvuhtii go ii bija muohttaga ovdalgo goas nu skábman ja muohttaga haga galbmojit ja billašuvvet šattut.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.