Davvi-Norgga el-fápmo fitnodagat lea manahan birrasiid 100 milljun kruvnnu go oste ossosiid North Energy oljofitnodagas, nu čájeha jahkerehketdoallu, čállá Dagens Næringsliv. Guhtta jagi maŋŋelgo álge ohcat oljju, ii leat gávdnon ii goaikkanas ge. Guovllu investorat leat eddon. Dál lea North Energy ossosa árvu njiedjan 26 kruvnnus 3 kruvdnii.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.