Oaivvildit politiijaid dájuhuvvon
Politiijaid oktasašorganisašuvnna fágabláđđi Politiforum, čállá ahte dievdu gii dubmehalai Čudejohtnjálbme goddináššis, dáidá leat dájuhan politiijaid. Politiforum fágabláđis eahpidit dievddu ballat girdimis. Ášši duogáš lea go politiijat su fievrrededje biillain ruoktot ovdan Romsii, go dievdu čuoččuhii ahte ii duostta girdit. Dát šattai máksit lagabui 90 duhát ruvnno. Politiforum cuiggoda go eiseválddit ná golahit ruđaid politiijaid bušeahtas, ja čállá dál ahte dievdu lea ovdal leamaš girdi mielde ja su bearrašis lea čáhcegirdi, maid son lea čuvvodan viššalit, čállá Altaposten aviisa.