Oktasaš viessu Romsii
- Livčče lunddolaš Romsii ásahit oktasaš deaivvadanbáikki sámiide ja kvenaide, lohká kveana nuoraidjođiheaddji, Nora Ollila. Álbmotčoahkkimis Romssas dán vahkus dovddahedje gávpotsámit ahte sii dárbbašit deaivvadanbáikki farggamusat.
Seamma čoahkkimis dat Ollila ge ovddidii evttohusa ásahit oktasaš viesu sámiide ja kvenaide.
Romssa sámisearvvi njunuš Sauli Guttorm, lohká kvenaid leat buresboahtin searvat dákkár viesu ásaheapmái, muhto lea dehálaš čielggadit ahte eai leat makkár ge formálalaš čuolmmat mat de sáhttet goazahit deaivvadanbáikki ásaheame.
