Gottit jámadit
Davvi-Amerihká gottiid lohku Labradora ja davit Nunaviikka guovllus leat issorasat nohkan maŋimus 4 jagis. Lohku lea gahččan 74 duháhis 14 duháhii, dieđiha Kalallit Nunaata knr.gl.
80 logus lei gottiid lohku logegeardái eanet vel go 4 jagi dassái, 800 duhát. Dalle lei dat máilmmi stuorámus goddenálli.
Laval nammasaš Universitehta ealliid biologa Steve Coté ii loga sihkkarit diehtit sivaid dasa go lohku njiedjá nu katastrofalaččat, muhto navdá máŋga čilgehusa dasa:
-Nuoramus gottit jápmet árabut dahje borrojit boraspiriide. Dasa lassin ii leat doarvái biebmu ja ollu dávddat maid dolvot ealliid, lohká Steve Coté.