Máze gilisearvi laigada lávvardaga Finnmárkku Spárka Meastergilvvuid. Gilvvuide leat dieđihan 16 joavkku. Dan jagi gilvvut leat golmmat háve ja dán jagi lea ge earenomáš ođđa gilvu, showa klássa, mii ii leat nu duođalaš. Dan gilvvu eaktu ii leat boahtit vuosttažin mollii, muhto ahte oasálastiin lea somá ja suohtas, muitala lágideaddji Máret Helene Eira
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.