Vêret gjorde at fellesfyrverkeriet i Molde blei utsett frå i går til i dag.
Klokka 20.00 var forholda gode nok til at fyrverkeriet kunne bli skote opp frå hamnebassenget i Molde.
Også i Kristiansund blei det kommunale fyrverkeriet nyttårsaftan utsett til i dag klokka 17.00 på grunn av dårleg vêr, og spesielt vind, i går. Det skriv Tidens Krav. Ordføraren i kommunen, Kjell Neergaard, seier til avisa at dei skal vurdere å flytte arrangementet permanent til 1. nyttårsdag.
I Ålesund blei det fødd eit tvillingpar like før midnatt. Ein gut blei først fødd klokka 23.37, deretter kom systera til verda eitt minutt seinare.
I Volda blei det fødd ei jente klokka 5.16 1. nyttårsdag, men ingen i Molde førebels.
To barn blei fødde i Bergen og i Akershus klokka 00.13, og dei er årets nyttårsbarn i Noreg.
Politiet i Møre og Romsdal har fått fleire meldingar om uvettig bruk av fyrverkeri, men det er enno ikkje meld om nokon personskadar. Politiet oppmodar til å ta omsyn og tenke på konsekvensar ved bruk av fyrverkeri.
Brannvesenet i Kristiansund måtte rykke ut etter melding om brann i eit fyrverkeribatteri ved Sankthanshaugen. Der skal ikkje ha vore personar der då brannmannskapet kom til staden.
Det utrygge vêret gjer at fellesfyrverkeriet i Molde vert avlyst. Det opplyser dagleg leiar av Krohn Pyroteknikk, Claus Ivar Krohn, til NRK.
– Kveldens fyrverkeri vert avlyst, men det vert skoten opp sundag 1. januar, seier Krohn.
