Dette skal du gjere med fyrverkerirestane

Den daglege leiaren ved reinhaldsverket viser oss opp til sorteringsbandet der fire personar har ansvaret for å gå gjennom alt av papp og papir som kjem inn frå kommunane på Ytre Søre Sunnmøre.

Berre i løpet av dei første dagane av det nye året har dei som står her funne ein god del fyrverkeriavfall.

Fem dagar inn i det nye året kan ein framleis sjå restar av fyrverkeri langs vegane rundt omkring, som etter kvart skal ende i søpla.

Dagleg leiar ved renovasjonsselskapet, Andrea Øien Sæverud, seier oppskrifta er enkel for levering av fyrverkerirestar:

– Alt fyrverkeriavfall skal først kjølast godt ned og deretter leggast i restavfallsdunken. Ubrukt fyrverkeri må for all del ikkje leggast i avfallet, men leverast inn att der det vart kjøpt.

Kvart år er det mange som syndar mot dette.

– Enkelte trur sikkert at papiravfallet er den rette plassen etter som store delar av fyrverkeriboksane er laga av papp. Men i tillegg inneheld det leire og restar av krut og eignar seg frykteleg dårleg for attvinning, seier Sæverud.

Ho legg til at det kan vere farleg å legge fyrverkerirestane i ein dunk som kanskje står inntil husveggen heime.

– Verken vi eller folk der ute som vi hentar avfallet hos ønskjer at dette i verste fall skal føre til brannar. Difor må ein tenke seg godt om når restane etter nyttårsfeiringa skal handterast.

Kvart år opplever dei ved samlebandet på Søre Sunnmøre Reinhaldsverk at ikkje alle veit eller tek omsyn til dette. Oppmodinga er difor sterk frå renovasjonsselskapa om at folk kastar fyrverkeriet i rett dunk.

– Følg råda til reinhaldsverket

Brannsjef i Ulstein og Hareid, Olav Helt Brubakk, seier folk må følge råda til SSR når det gjeld retur av brukt fyrverkeri. Han seier likevel at brannfaren ikkje er så stor med fyrverkeriavfall.

– Det som derimot er ein større brannfare er det som ikkje har gått av, for der er det ubrent krut. Så ubrukt fyrverkeri bør definitivt ikkje leggast i pappavfallet, seier han.

– I løpet av mi tid i brannvesenet har vi aldri hatt tilfelle der det har vore problem med dette, men branntilløp på anlegget til SSR er noko dei har teke seg av sjølv, seier brannsjefen.