Det var TK.no som først omtalte saka.
I 20.00-tida onsdag kveld rykka væpna politi ut til ein situasjon på Averøya.
– Bakgrunnen for aksjonen var at vi fekk ei uromelding frå ein mann som følte seg trua av ein annan mann, fortel Frode Gjøsund, operasjonsleiar ved politiet på Nordmøre og i Romsdal til NRK.
Skytevåpen involvert
Ifølge operasjonsleiaren oppstod det ein situasjon mellom dei to mennene som har hatt ei konflikt i ei lengre periode.
– Den eine av dei involverte var utstyrt med eit skytevåpen og vi valde difor å væpne oss for vår eigen og andres tryggleik, seier Gjøsund.
Politiet rykka raskt ut til staden der dei fekk kontakt med den aktuelle personen via telefon.
– Det heile gjekk for seg utan dramatikk og mannen gav frå seg skytevåpenet frivillig, seier han.
Vedkomande blir no tatt med til politistasjonen i Kristiansund for vidare avhøyr, og våpenet blir beslaglagt av politiet. Politiet vil så langt ikkje seie noko om kva konflikten gjekk ut på.
Sak blir oppretta av politiet.