Det var i 19:30-tida i kveld at det som kunne ha blitt ein alvorleg situasjon i den undersjøiske Eiksundtunnelen, oppstod i samband med ei forbikøyring.
– I alt tre bilar var involverte. Ein bil som blei forbikøyrd og ein som kom i møte. Forbikøyringa skjedde slik at ein møtande bil måtte legge seg heilt ut mot autovernet for å unngå møtekollisjon, fortel operasjonsleiar Trygve Ødegård ved Sunnmøre Politidistrikt.
Det har tidlegare vore fleire alvorlege bilulukker i Eiksundtunnelen etter at han blei opna i 2008.
Tunnelen knyt Ulstein saman med fastlandet i Ørsta, er rekna som ein av verdas djupaste undersjøiske tunnellar, med ei djupne på 287 meter.
Skadar på bilen
Bilen som måtte vike for å unngå kollisjon måndag kveld, kom bort i autovernet, og fekk påført mindre skadar.
– Det kunne ha gått gale i Eiksuntunnelen i kveld, og difor ønskjer å kome i kontakt med bilen som blei forbikøyrd for vi treng vitne til episoden, seier Trygve Ødegård.
Aller helst ønskjer politiet å kome i kontakt med føraren av bilen som gjorde den uvettige forbikøyringa.