Tillitsvald: – Eg har min fulle tillit til at leiinga finn ei løysing

Avtalen mellom Farstad Shipping og Siem Oil Service Invest med ein verdi på ein milliard kroner har gått i i vasken. Ikkje alle kreditorane gjekk med på avtalen og dermed må ein legge ein ny plan for korleis økonomien til Ålesundsselskapet skal reddast. No har Farstad frist ut månaden med å finne ei løysing med dei store kreditorane. Reiarlaget har 1725 tilsette og har snart 2 milliardar i gjeld.

Oppseiingar og permitteringar

Hovudtillitsvald Kim Lekva Velve er sikker på at det kjem ei løysing for selskapet.

– Dei tilsette er nervøse for arbeidsplassane. Vi har vore gjennom permitteringar i to år, oppseiingar og ein snuoperasjon. Vi ser fram til at det blir meir stabilt i bransjen og at oljeprisane snur, seier Velve.

Han meiner at selskapet er best tent med å vere åleine og har full tillit til at leiinga klarer få i hamn ein avtale.

– Eg har full tillit til leiinga og at vi held fram med å vere Farstad Shipping, som vi er kjent for gjennom lange tider, seier Velve.

Trur forhandlingane fører fram

Karl Johan Bakken seier at dei jobbar no med ei løysing saman med kreditorane for Farstad Shipping åleine.

– Grunnlaget for at Farstad skal drive vidare som eit sjølvstendig selskap, ligg inne i ei refinanseringsordning som vi forhandlar med kreditorane om. Det er god grunn til å tru at forhandlingane fører fram til semje, seier Bakken.

Bakken trur at situasjonen i marknaden kjem til å bli endå verre framover enn i 2016.

– For vår del ser vi marknadssituasjonen i 2017 som utfordrande. Og det er like stor uvisse om kor tid det blir betring, som før, seier Bakken. Sjølv trur han det kan bli betre inn mot 2018.