Bente fekk kreft og prolaps – berre éin ting fekk ho opp av senga

– Eg klarte ikkje svare på meldingar. Eg klarte ikkje røre meg. Eg låg rett ut og venta på at tida skulle gå.

Vi møter nordmøringen Bente Gundersen heime i huset hennar på Frei som ligg heilt for seg sjølv nede ved vasskanten.

Inne bognar det av gamle møblar og pyntegjenstandar. I tillegg finn ein garn, strikkepinnar, fullførte strikkeprosjekt og andre tekstil i alle krokar.

For det er det som er livet, meiner Bente. Ho elskar å vere kreativ.

Den låge sola skin gjennom dei rutete vindauget og treffar Bente i ansiktet.

No kan ho sitje oppreist, men for ei stund sidan var det utenkjeleg.

Sjukdom og smertar

Det har vorte lite av kreative prosjekt heime hos nordmøringen i det siste.

Eitt år seinare måtte ho gjennom ein ny operasjon. Prolapsen kom tilbake, og Bente vart sengeliggjande på nytt.

– Det har vore nokre smertefulle år.

Kreativiteten blomstra

Smertene gjorde at ho ikkje kunne gjere anna enn å liggje heilt stille i senga. Sjølv det å få i seg mat vart vanskeleg.

– Heldigvis kom mamma og pappa med middag til meg, seier ho.

Så fekk ho ei melding om ein strikkekonkurranse.

Nordmørsmusea lyste ut ein strikkemønsterkonkurranse med temaet «Nordmørsmotiv».

– Eg vart veldig sint. Kvifor skulle han komme akkurat no, når eg ikkje kan vere med, sa ho til seg sjølv.

Likevel byrja tankane til den kreative dama å spinne. Ho klarte ikkje unngå det.

«Korleis skulle eg ha løyst denne oppgåva dersom eg kunne vorte med?»

Tok førsteplassen

Ei gammal bunadsbok med mønster frå Nordmøre vart mellom anna brukt som inspirasjon.

Til slutt kom ho seg opp av senga. Oppreist ved eit bord teikna ho strikkemønster med feil hand.

– Eg kan ikkje seie at eg spratt opp av senga, men det var ei glede å stå opp òg, seier ho.

Ho fekk ei venninne til å strikke ut mønstera ho hadde teikna, og fleire plagg vart sendt inn som bidrag til konkurransen.

Det viste seg å lønne seg, for Bente stakk av med både første- og andreplassen.

Bente er langt frå den einaste som har brukt ein hobby eller lidenskap som terapi.

Vilde Nerås i Molde fortalde nyleg at ho strikkar for å takle det negative nyheitsbiletet, og Simen Holvik spring for å finne roa etter at han mista kona.

Jakob Linhave, avdelingsdirektør i Helsedirektoratet, seier at det er bra å ha ein meiningsfull hobby.

– Det å ha noko å halde på med som gir oss gode kjensler, eit prosjekt eller nokre mål som kjennest meiningsfulle, er bra for helsa.

Heildagsstrikking i januar

Førstepremien i konkurransen var absolutt ikkje målet til Bente, men ho innrømmer at det var litt stas likevel.

– Det er jo gøy ... Det at andre skal gå rundt med genseren eg har laga, det håpar eg mange vil, seier ho og ler.

Bente fortel at ho ikkje har strikka spesielt mykje etter at plagga vart leverte inn til konkurransen.

– Eg hadde nok teke meg heilt ut, seier ho.

– Er du redd for at strikkegleda ikkje kjem tilbake?

– Nei ikkje endå. Eg har ei heil bok med mønster eg skal realisere. Så fort det blir januar, då blir det heildagsstrikking.