Rekneskapstala for 2013 er enno ikkje klare, men tala for 2012 talar sitt klare språk: den maritime næringa hadde ei omsetning på heile 62 milliardar kroner. Til samanlikning var omsetninga på 1,49 milliardar kroner åtte år tidlegare.
– Heilt fantastisk
Det viser ein fersk rapport frå Menon Business Economics. Rapporten vart utarbeida på oppdrag frå Maritimt Forum Nordvest.
– Utviklinga dei siste ti åra har vore heilt fantastisk, seier dagleg leiar Arnfinn Ingjerd.
Møre og Romsdal er fylket med den høgaste verdiskapinga dei siste ti åra. I dag står den maritime næringa for 30 prosent av verdiskapinga. Det er høgare enn for noko anna fylke.
Tala tek utgangspunkt i norske reiarlag, utstyrsleverandørar, verft og maritime tenester, men ikkje fiskerinæringa.
Maritime Sunnmøre
Det er kommunane Ulstein, Herøy, Haram og Sande på Sunnmøre som er dei mest maritime. I Ulstein kjem heile åtte av ti arbeidsplassar frå næringa. Ifølgje Maritimt Forum er det Herøy som hatt den mest formidable veksten frå 2011 til 2012 på grunn av offensive reiarlag i ein sterk vekstfase. 1000 fleire er sysselsette i verftsindustrien og omsetninga har auka med to milliardar.
- Les også:
Trur veksten held fram
Ingjerd trur tala for 2013 vil vise til same stigande kurve når rekneskapen er klar, og at oppturen vil halde fram i åra som kjem.
– Kompetansen og pågangsmotet i klynga er større enn nokon gong. Konkurransen og samarbeidet mellom bedriftene skapar ei unik innovasjonskraft, seier han.
– Marknadsutsiktene er generelt positive, sjølv om vi alltid må rekne med svingingar. Verda treng kompetanse og teknologien som vert utvikla i klynga. Derfor er vi optimistar, seier han og legg til at eit fall i oljeprisen og den generelle verdsøkonomien er det som kan skiple vekstraten.
Berre petroleumsnæringa utgjer i dag ein større del av norsk eksport enn den norske maritime næringa.