På Vartdal i Ørsta har dei no ein sambygding som er toppsjef i Statoil. På daglegvarebutikken blir den nye Statoil-sjefen mykje snakka om i dag. Dei er overbeviste om at vartdalingen kjem til å gjere suksess.
– Han kjem til å gjere det veldig bra, seier butikkarbeidaren Bjarte Roth.
På skikkeleg sunnmørsk legg han sjølvsikkert til: «Oss sunnmøringa kan ditta. Oss kan ditta med penga».
Han er ikkje den einaste som har trua på Eldar Sætre. Arne Boska meiner at vartdalinga veit godt korleis ein skal leie.
– Vartdalingane er jordnære, dyktige og innovative. Vi er veldig kry over at ein gut frå bygda greier å markere seg på denne måten, seier han.
Mor om sonens nye jobb
Eldar Sætre var styrets førsteval, og har hausta berre lovord hos Statoil-styret. Sætre som til no har vore konstituert i stillinga, sa tidlegare at han ikkje ønska jobben.
Mor til Sætre, Emma Johanne Sætre (96), vil ikkje skryte for mykje av sonen, men innrømmer at dette var over all forventning.
– Du er vel litt stolt og glad?
– Jau, litt i bakhovudet. Men eg brukar no ikkje å flakse rundt med det, seier 96-åringen.
Ho spring kanskje ikkje rundt i bygda for å fortelje nyheita til alle, men ho er stolt over at sonen har streva seg fram sjølv. Ho fortel at ho alltid har tenkt at han kom til å arbeide seg framover mot ei god stilling i arbeidslivet.
- Les også:
– Han var den typen som gjerne låg i bakgrunnen ei stund for å så plutseleg komme fram. Men dette er mykje over mine forventningar må du skjønne, seier ho.
– Berre ein ting har forandra seg ved han
Storesøstera Oddrun Godø har gode minner frå tida då dei vaks opp saman på Vartdal. Ho seier at broren ikkje har forandra seg i det heile etter 35 år i Statoil. Eller – ein ting har kanskje forandra seg litt.
– Han har lagt litt på seg. Han har nok ete mykje god mat, men han har ikkje forandra seg. Han er akkurat den same, seier ei stolt søster.