– Det var ein heilt spontan reaksjon på at eg henta avisa i postkassa, seier Runar Gudnason, aka Sjef R.
Det var tysdag at rap-gruppa Side Brok frå Ørsta la ut følgjande på si Facebookside:
«Slik står det til der me kjem frå: Ein av prestane seier at han ikkje vil vie homofile, men at dei sjølvsagt er velkomne i kyrkja (ja, han seier ‘sjølvsagt’!). Dei to andre prestane sit på gjerdet, og har ikkje bestemt seg enno.
Reservasjonsrett har vorte veldig populært, og no vil me òg ha det: Frå no av er konservative kristne og andre homofobar ikkje velkomne på Side Brok-konsertar. De er sjølvsagt velkomne til å høyre musikken vår på Spotify, men de slepp ikkje inn når me spelar konsert. Det forstår de sikkert. Nestekjærleik meg i ræva».
Stort engasjement
I løpet av eit par timar hadde innlegget fått nesten 900 delingar og over 6.700 reaksjonar på Facebook. Gudnason var overraska over responsen.
Runar Gudnason blei overraska over responsen.
Foto: Ivar Eidheim / NRK– Eg hadde aldri forventa at det ville få så mykje merksemd. Eg berre skreiv noko fordi eg blei veldig skuffa då eg såg det som stod i avisa. Det har lenge vore mykje kristendom og konservative kristne her i Ørsta, men no har vi trass alt unge prestar, seier han.
Han meiner at responsen viser at han ikkje er aleine om synet sitt.
– Det seier litt om kor ute av takt med tida desse prestane er, seier han.
- Les også:
Ville sette saka på spissen
Utspelet kjem etter at kyrkje denne veka opna opp for at homofile og lesbiske par kan gifte seg i kyrkja. Samtidig kan dei prestane som ønskjer det reservere seg. Gudnason fortel at formålet med innlegget var å sette saka på spissen.
– Det var ei samanlikning for at folk skulle sjå kor dumt det var. Eg verken kan eller vil nekte nokon å kome på konsert. No er eg ikkje kristen sjølv, men eg meiner at kyrkja bør vere ein inkluderande plass, seier Gudnason.
– Kyrkja og ein Side Brok-konsert må kanskje vere dei to mest inkluderande plassane som finst. Og det er like latterleg å stenge folk ute frå begge deler.
– Men bør ikkje dei prestane som har eit anna syn få lov til å reservere seg?
– Nei, enkelt og greitt. Eg synest denne reservasjonsretten er verre enn dei andre på spesielt eit punkt. Det finst sikkert mange homofile i Ørsta som både har døypt og konfirmert seg i den kyrkja og som ønskjer å gifte seg der. Då er det ikkje likegyldig å finne ei anna kyrkje eller ein annan prest, seier Gudnason.
Tradisjonelt syn på ekteskapet
Det har så langt ikkje lukkast NRK å kome i kontakt med sokneprest i Hjørundfjord og Bjørke, Espen Aarseth, for ein kommentar.
Som grunngjeving for kvifor han ikkje vil vie homofile har han sagt følgjande til Møre-Nytt.
– Eg har eit tradisjonelt syn på at ekteskapet skal vere mellom mann og kvinne. Det er mange nyansar i denne saka, og det er inga lett sak. Ting er ikkje svart kvitt, og vi må ikkje ende opp som englar eller mørkemenn. Eg ønskjer å vere open og eit medmenneske, samstundes har vi også Bibelen som vi prestar er tilsette for å lære ut frå, seier Aarseth.
