– Vi starta med eit arbeid i juni for å fornye festivalen. Det skulle vi halde fram med i august, men så bestemte Charles Williamsen seg for at han ville halde på med noko anna og sa opp stillinga si. Det gjer at vi no må ta ein fot i bakken, fortel styreleiar i Nordic Light Lars Liabø.
Charles Williamsen tok over som festivalsjef etter Anne Lise Flavik i februar 2014, men før helga vart det klart at han no seier opp stillinga si. Liabø seier at vegen vidare blir bestemt i august og fortel at han er glad for at sponsorane har kome med positive signal.
– Ja, dei signala har vi fått, og det er klart at det er svært verdifullt for oss. No tar vi ein fot i bakken i august, men det er ikkje tvil om at vi må fornye oss
Balanse
Nordic light vart arrangert første gongen i 2006, og årets utgåve av festivalen var nummer ti i rekka. Liabø fortel at kulturleiarjobben er krevjande, då det er fleire omsyn som må vurderast mot kvarandre.
– Du har ein balanse mellom, du har heile tida eit krav om å levere kunstnerisk og det kostar. Det kostar for eksempel for oss å hente ein kjent fotograf frå USA til Kristiansund. Det er ein kamp heile tida å avbalansere økonomi mot det kunstneriske opplegget.
Heile året
Nordic Light kjem til å satse på meir heilårsdrift i huset sitt framover. Liabø fortel at dei har eit godt grunnlag å bygge vidare på.
– Det vi har oppnådd både kunstnerisk og av publikumstilstrøyming har vore slik vi forventa det og kanskje litt meir.