– Det er jo dette vi øver til. Så vi er glade for å bli brukt, seier Irene Kvangarsnes Flaaen, koordinator for hjelpekorpsa i Møre og Romsdal.
Ho seier at dei sjølvsagt rykker ut på dei klassiske leiteaksjonane. Men no er det også ein kraftig auke i talet på henteoppdrag som hjelpekorpsa utfører for helseføretaket.
Allereie i juni hadde hjelpekorpsa hatt like mange oppdrag som i heile fjoråret.
Hektisk aktivitet i fjellet
Søndag var hjelpekorpsa i aksjon både i Sykkylven og i Tafjordfjella.
Seks personar rykte ut til Danskehytta i Tafjordfjella. Ein turgåar hadde blitt sjuk, og det var ikkje råd å gå dit med helikopter. Hjelpekorpsfolka overnatta saman med pasienten på hytta. Måndag fekk dei han med til lege.
- Les også:
Mange henteoppdrag
– AMK brukar oss meir enn før, seier Irene Kvangarsnes Flaaen. I juli hadde hjelpekorpsa 25 oppdrag. Heile 22 av dei var henteoppdrag.
– Viktig del av tilbodet
Seniorrådgjevar Hans Joakim Riise ved AMK-sentralen er glad for all hjelpa dei får frå dei frivillige i hjelpekorpsa.
– Før måtte vi gå via politiet. No kan vi ringe rett til hjelpekorpsa. Eg trur det er bra. Hjelpekorpsa er ein viktig del av det totale redningstilbodet, seier han.