Politiet undersøkjer opplysningar om farleg stoff etter to dødsfall

– Ein mann og ei kvinne i 20-åra har med kort tids mellomrom blitt funnen død i Ålesund. Det er i samband med dette vi ønskjer å gå ut å åtvare mot spesielt GHB, seier politiinspektør Yngve Skovly.

Han peikar på at det foreløpig er for tidleg å seie noko om dødsårsaka til dei to som i løpet av helga og på måndag vart funnen død.

– Det er spesielt at to så unge døyr med så kort mellomrom, seier han.

Politiet ventar no på svar på prøvene frå dei omkomne, for å kunne seie kva som har skjedd.

– Vi ventar framleis på resultata av dei rettsmedisinske undersøkingane, noko som kan ta tid. Politiet har fått informasjon om at ein av dei avdøde kan ha innteke GHB i forkant av dødsfallet, seier politiinspektør Yngve Skovly.

Får ikkje ut informasjon

Det er etter rykte i sosiale medium som gjer at politiet ønskjer å gå ut med opplysningar om at det kan vere farlege stoff i omløp.

Politiet har teke beslag av ulike typar narkotika den siste tida. Politiet åtvarar mot all bruk av narkotika, og særleg mot bruken av GHB.

– GHB er i utgangspunktet eit veldig farleg stoff frå før, men vi undersøkjer no om det er snakk om farlegare stoff i omløp, seier Skovly.

Vanskeleg å informere

Eva-Brit Langva i Kirkens Bymisjon i Ålesund, meiner byen burde få på plass eit lågterskeltilbod til rusavhengige, som blant anna kan informere rusavhengige om farleg narkotika som er i omløp.

– Hadde vi hatt eit slikt tilbod oppe og gå no, så kunne vi ha åtvara mot dette mykje tidlegare, seier ho.

Ho peiker også på at koronakrisa også har skapt problem for kva rusmiddel ein kan få tak i.

– Når marknaden er meir ustabil som no, så har ikkje dei rusavhengige moglegheit til å vere kresen på kva dei tek, seier ho.