Meiner dei har stoppa sentral kvinne i narko-nettverk

Det var før jul i fjor politiet igjen kom på sporet av den 38 år gamle kvinna, som er domfelt 12 gongar dei siste tjue åra.

I retten la politiet fram bevis på at kvinna har oppbevart litervis med GHB/GBL, og hatt omfattande telefonkontakt med til saman 36 tidlegare narkotikadømde personar. Retten meiner dette viser at ho er ein sentral aktør i eit omfattande nettverk der kjøp, sal og bruk av narkotika er fellesnemnaren.

– Vi reknar henne for å vere ein sentral aktør pmellom anna å grunn av dei mengdene med stoff vi har beslagslagt frå henne, stadfestar politioverbetjent Sindre Ryssevik hos politiet.

Arrestert austeuropear

Frå før er det kjent at politiet i Ålesund har arrestert ein austeuropear som skal vere sentral i den same saka. I sommar sa politiet at dei hadde funne over 20 liter GBL som hadde tilknyting til mannen. Han blei også sikta for heleri av minst 600 000 kroner.

I samband med ransaking hos mannen skal dei også ha funne oppskrift for korleis ein lagar GHB av GBL.

Mannen har site varetektsfengsla sidan i mai, og rettsaka mot han startar i januar.

Les også:

• Avhøyrer 26 personar i GHB-sak i Ålesund
• I norgestoppen på beslag av GHB og GBL

Blir ikkje dømd for det største beslaget

Det var etter alt å dømme ålesundskvinna som førte politiet til den austeuropeiske mannen. I den nye dommen frå Sunnmøre tingrett kjem det fram at politiet i desember 2016 fann vel tre liter GBL/GBH heime hos kvinna. Då dei gjekk gjennom mobilen hennar, oppdaga dei at ho skal ha kommunisert med mannen om endå meir stoff, som skulle vere gøymt i bilen hennar.

Då politiet kom fram til adressa, fann dei 10,5 liter GBL.

Begge nektar for at stoffet høyrer til dei, og politiet har ikkje klart å bevise kven det høyrer til. Trass i at det er funne DNA frå kvinna på bagen der stoffet låg, meiner retten at dette ikkje held til å dømme henne.

Politijurist Lena Katrin Romestrand avviser at politiet ikkje har vore flinke når dei ikkje klarer å knyte stoffet til henne.

– Nei, tvert om er det eit godt stykke politiarbeid som gjer at vi klarer å finne stoffet i det heile tatt. Det visste vi ikkje om då vi pågreip henne, seier Romestrand.

Nedfrosen urin

No må kvinna i fengsel. Sist ho blei dømd, i mars 2017, fekk ho ei fengselsstraff på 4 år, der 3 år og 2 månader var på vilkår, mot at ho gjennomførte eit kursopplegg for narkotikadømde. Men i dommen heiter det at kvinna gjennom framferda si har vist at det ikkje er grunnlag for å halde fram narkotikakurset. I dommen kjem det fram at ho mellom anna har frose ned urin for å kunne dokumentere reine prøvar.

Når ho no har gjort seg skuldig i endå fleire narkotikalovbrot, må ho sone den gamle fengselsstraffa, i tillegg til tre månader for det siste ho har gjort.

Dermed må kvinna no i fengsel i 3 år og 5 månader.

Reidar Andresen, som representerer kvinna, seier han ikkje har rekt å lese dommen eller snakka med kvinna. Han vil difor førebels ikkje kommentere dommen.