Bilferja Høgsfjord som tar 50 færre bilar enn den ordinære ferja, klarer ikkje å ta unna den store rush-trafikken. Ein politipatrulje på tre mann kom til ferjekaia no i ettermiddag, og overvakar det som skjer på kaia.
– Vi er på plass for å sjå til at det ikkje oppstår tull og tøys mellom ferjeavgangane, stadfester operasjonsleiar Jon Kåre Flo ved Sunnmøre politidistrikt.
Flo understrekar at politiet ikkje aktar å drive trafikkovervaking på kaia, men at dei er der fordi det har oppstått episodar siste dagane.
– Enkelte bilistar som har stått att etter at ferja har gått, har tatt snarvegar over rabattane for å sikre seg god plass til neste avgang. Dette har ført til at dei som køyrer lovleg og tar rundkøyringa for å stille seg i ferjekøa igjen, har hamna sist i køa, seier Flo.
Politiet kjem til å vere på staden i eit par timar framover.
Ved ferjeavgangen frå Hareid i 17- tida no i ettermiddag, stod fire rader med bilar att på ferjekaia. Det var rett og slett ikkje plass til fleire bilar ombord på Høgsfjord, og dermed blir det ventetid for mange, seier folk på staden som NRK har vore i kontakt med.
Slik var situasjonen på ferjekaia i 17-tida i ettermiddag.
Foto: Tipsar- Les også:
