Då Bente Elvebu køyrde søstera til jobb fekk ho auge på ein blodig pose i vegkanten. På veg tilbake bestemde ho seg for å gjere noko.
– Eg tenkte, nei stakkars den som eig den katten, dei skal sleppe å komme å sjå den her.
Bente parkerte bilen, og tok ein rask titt i posen, før ho la den i bagasjerommet.
– Eg kika så vidt nedi, der såg eg ein snute og noko pels, seier ho.
Bente tenkte at det var ein brun, spraglete katt. Men ho reagerte på vekta til dyret.
– Steike så tung han var, eg trudde det var ein stor hannkatt, seier ho.
Leverte dyret til veterinær
Bente leverte katten til Veterinærkontoret i Ulsteinvik, og spurte om ikkje dei kunne sjekke om den hadde chip, elektronisk ID-brikke.
Som den dyrevenen Bente er, la ho ut eit innlegg i Facebookgruppa «sakna å etterlatne dyr i Ulsteinvik/Hareid.» Så fort ho kom heim, ringde dei frå kontoret.
– Så da tenkte eg at dei ikkje hadde funne nokon chip, og berre ville gje beskjed, seier Bente.
Telefonsamtalen blei hakket meir overraskande ein det ho hadde sett for seg.
For det var ikkje ein katt Bente hadde funne, det var ein oter.
– Kva for noko, sa eg, ein oter? Eg trudde ikkje mine eigne øyrer, fortel Bente.
Engasjerte mange
I staden for å ta vekk Facebook-innlegget så skreiv Bente at det var ein oter, dyret ho fann.
– Eg trur det var veldig mange som fekk seg ein liten latter i går, det er typisk meg å komme opp i slike situasjonar, seier ho og ler.
Det var assistent og biolog Olaug Fuglseth som skulle sjekke dyret i posen. Ho blei overraska då ho opna den, og såg fort at det ikkje var ein katt.
– Den hadde svømmehud blant anna, eg såg det ganske fort. Då måtte eg gje beskjed med ein gong at ho ikkje trong leite etter eigaren, seier Fuglseth.
Så ringde ho viltnemnda, for det er dei som skal få beskjed om døde otre.
Klinikkleiar Henriette Wiik Larsen seier dei får inn mange katter dei må sjekke chipen på, men det er fyrste gong dei får inn ein oter.
Ho oppfordrar dei som er så uheldige at dei køyrer på eit vilt dyr til å kontakte viltnemnda eller politiet.
Oppdatert: Personen som har køyrt over oteren har innrømt dette i et svar til Bente sitt innlegg på Facebook. Dyret blei ifølgje svaret lagt i ein pose og låg klart til politiet, som skulle organisere henting.
Hei!
Har du noe på hjertet eller tips du mener vi i NRK Møre og Romsdal burde se på?
Send meg en e-post.
Les gjerne saken jeg skrev om julelysa som skaper debatt, eller øykommunen uten ett eneste koronatilfelle.