Han er jeger i fisken sitt territorium

Om éi veke er det verdsmeisterskap i undervassjakt i Peru og Ørjan Dyrnes frå Kristiansund skal forsvare dei norske fargane. For tida er han på treningsleir saman med resten av det norske landslaget på kysten av Peru.

• Les også: Tok steinbit på 12,8 kilo med harpun

I undervassjakt skal ein ut i båt og fange fisk. Men det er ikkje nokon vanleg fisketur, for undervassjegeren må hoppe i havet for å fange fisken.

– Vi bevegar oss i fisken sitt territorium, og då er det viktig å vere stille og ikkje skremme vekk fisken. Derfor held vi pusten, seier Dyrnes.

Enkle jaktreglar

For å kunne jakte under vatn bruker ein hovudsakleg harpun som fangstvåpen. Ein har ikkje med seg mykje utstyr, og ein kan berre bruke lungene som luftreserve når ein er under vatnet.

• Les også: Rekordtorsk på fridykk

Det er kanskje ikkje så mange som er godt kjent med denne sporten, men ifølge Dyrnes er reglane i konkurransen ganske enkle.

– Vi får eit avgrensa geografisk område og kvar vår båt. Det er fellesstart, og så får vi seks timar før vi skal vere tilbake til startpunktet. Då skal vi ha fanga mest mogleg fisk.

Utfordrande å jakte under vatn

Sidan VM er på den andre sida av jordkloden, er det mykje nytt å bli vande til. Forholda langs stillehavskysten er vanskelegare enn i norske fjordar.

– Det er dårleg sikt i forhold til det vi er vande med heime, for det varierer frå ingen sikt til tre-fire meter. Heime i Noreg er vi vande med at det er minst tre-fire meter og det beste vi har er opptil 25 meter. Så det er utfordrande forhold, seier den erfarne undervassjegeren.

• Les også: Klare for høstens våteste jakt

I tillegg til meir grumsete vatn enn vanleg, er det òg fullt av eksotiske dyreartar å følge med på.

– Det er mykje nytt her. Her er pingvinar, og det er sjøløver som dykkar og svømmer ved sida av oss heile tida. Her er også pelikanar, havsule og mykje som er utruleg spennande, seier Dyrnes.

Større sport i utlandet

Ørjan Dyrnes byrja å konkurrere i 2005 og har blitt noregscupvinnar, noregsmeister, og han har gull og sølv i nordiske meisterskap. Sjølv om Dyrnes er ein godt merittert undervassjeger i heimlege farvatn, er han beskjeden når han skal skildre kva sjansar han har for medalje i VM i Peru.

– Sporten i Noreg er veldig liten. I Noreg er langrenn stort, men i Spania, Italia og Portugal er undervassjakt like stort som langrenn er i Noreg, seier Dyrnes.

VM i undervassjakt går føre seg frå 28. oktober til 2. november.

• Les fleire nyheiter