(Vi har noen utfall, trolig på grunn av laber 4G-dekning).
Gjennom heile Noreg skal det organiserast eit nett med nasjonale sykkelruter. Rute nummer ein startar ved Svinesund og endar i Kirkenes. Det er denne ruta som går kystvegen gjennom Møre og Romsdal.
Her er ruta som Vemøy syklar. Han er utstyrt med GPS-sendar, og du kan følgje han i kartet på heile ruta til Ålesund.
Atlanterhavsruta, som er ein del av Nasjonal sykkelrute nr. 1, er 20 mil, og går mellom Kristiansund og Ålesund. Vemøy droppar hurtigbåten mellom Hamnsund og Ålesund. Han syklar i staden via Tennfjord, Stette, Mørkeset og Olsvika til Ålesund.
NRK Møre og Romsdal har lagt opp til følgjande rute onsdag:
- Klokka 07.30: Start frå tunnelopninga på Averøya. Atlanterhavsvegen- Bud-Hollingen.
- Klokka 12.45: Ferje Hollingen–Aukra
- Klokka 13.40: Ferje Småge-Orten-Finnøya
- Klokka 15.30: Ferje Harøya–Brattvåg
- Klokka 16.25: Siste etappen: Søvik-Tennfjord-Mørkeset-Olsvik-Ålesund
- Klokka 18.30/19.00: I mål i Ålesund
NRK Møre og Romsdal gjer dette for å vise fram den nye nasjonale sykkelvegen gjennom fylket. Det er ein tur der vegane nokre stader går heilt i fjøresteinane. Naturen er nydeleg og mykje av turen går på lite trafikkerte vegar.
NRK Møre og Romsdal gjer dette også for å teste ulike typar sendeutstyr til bruk i forskjellige situasjonar. NRK har laga mange direktesendingar før. Men etter det vi kjenner til er ei så lang direktesending på sykkel grensesprengande.
NRK Hordaland har tidlegare sendt direkte frå sykkel, men ikkje på ein så lang tur som Atlanterhavsruta.
Ei stor utfordring blir å sikre nok tilgang på straum til dei ulike tekniske utstyra. Tilgangen på straum vert truleg den største avgrensande faktoren. Det kjem til å bli behov for batteriskift og lading.
Dei delane av strekninga som ikkje blir sendt direkte, blir lagt ut i opptak i ettertid.
Syklisten er utstyrt med eitt kamera på hjelmen og sykkelen har eit kamera som peikar bakover. På sykkelstyret har syklisten eit lite miksebord som kan brukast til å veksle mellom dei to kamera. På sykkelstyret er der også ein monitor slik at syklisten kan sjå bileta som går ut.
Bake på sykkelen ligg sjølve sendaren, ein LiveU. Denne sendaren bruker mobildata-nettet og inneheld fleire SIM-kort for å oppnå god nok kapasitet. Denne typen sendar har i stor grad teke over for mykje av produksjonstrafikken som TV-stasjonar tidlegare brukte satellitt og faste fiber-samband til.