Det har blitt mange kakestykke for innbyggarane i Aukra dei siste åra. Kvar gong Noregs rikaste kommune har opna ein ny barnehage, skule eller badeland har det vore tradisjon å servere marsipankake til alle innbyggarane.
Det er eigedomsskatten som har gjort kommunen så rik.
No slår Møre og Romsdal tingrett fast at kommunen har vore i sin fulle rett til å krevje inn eigedomsskatt i rikt monn.
Dommen inneber at kommunen slepp å betale tilbake rundt 300 millionar for åra 2018–2022.
«Retten har kommet til at ingen av Gasscos anførsler kan føre fram og at det ikke er grunnlag for å sette klagenemndas vedtak til side som ugyldig» heiter det i dommen.
– Veldig glad! Det er ein gledens dag i Aukra, jublar ordførar Helge Kjøll (KrF).
Betalar 250 millionar i eigedomsskatt kvart år
Det er eigaren av det enorme ilandføringsanlegget av gass på Nyhamna som har gjort Aukra så utruleg rike. Ingen annan kommune har større inntekter frå eigedomsskatt per innbyggar.
Kvart år forsyner Gassco kommunekassa med 250 millionar kroner. Selskapet hevdar hevdar kommunen har tatt inn langt meir enn dei burde. I retten blir påstandane tilbakevist på punkt etter punkt.
Aukra kommune er blankt frifunne. I tillegg må Gassco betale 4,5 millionar kroner i sakskostander for å ha tatt saka til retten.
Gassco sin advokat hevda kommunen har bomma med over ein milliard kroner då dei fastsette takstgrunnlaget for eigedomsskatten, men dette blir altså tilbakevist.
– Usemja gjeld både den metodiske framgangsmåten og ein del av utrekningane som låg til grunn for taksten, skriv advokat Finn Backer-Grøndahl i sluttinnlegget.
Det har førebels ikkje lukkast NRK å få ein kommentar til dommen.
Ventar fleire rettssaker
Det er få skattar som set sinna meir i kok enn eigedomsskatten. Og det er ikkje berre privatfolk som kranglar med kommunen om den utskjelte eigedomsskatten.
Langs norskekysten ligg åtte olje- og gassanlegg og fleire av dei har gått heilt til retten for å avgjere kor mykje dei skal betale til vertskommunane.
Caroline Lund er advokat for Aukra og fleire av dei andre kommunane. Ho har førebels ikkje rokke å studere dommen, men meiner resultatet er prinsipielt viktig.
– For alle dei kommunene vil denne dommen ha betydning i den grad dei er underlagt særskattereglane, seier ho.
- Allereie i 2019 gjekk Equinor til rettssak mot Karmøy kommune og hevda eigedomsskatten var alt for høg. Men selskapet tapte på alle punkt, og Lagmannsretten avviste anken.
- Seinare denne veka skal Høgsterett behandle striden mellom Equinor og Alver kommune i Vestland. Nyleg blei det klart at saka hamnar i Høgsterett.
Fire veker ankefrist
Ordføraren i Aukra, Helge Kjøll, seier han ikkje er overraske over utfallet, men likevel svært letta.
Øykommunen har i lang tid planlagt fastlandssamband, og Kjøll seier dette hadde stått i fare dersom dei hadde tapt.
Måndag føremiddag slo Møre og Romsdal tingrett fast at Aukra ikkje har kravd inn for mykje eigedomsskatt.
– Når dette blir kjent vil folk, både politisk, adminstrativt og folk i kommunen, kjenne på ei stor lette, seier han.
Dommen er ikkje rettskraftig. Ankefristen går ut om fire veker.