NRK Meny
Normal

Nesten for Smøla-gutta i den nasjonale Klassequiz-finalen

Klassequiz-laget frå Møre og Romsdal var berre eitt rett svar unna å nå superfinalen. Likevel er dei tre gutane frå Smøla storfornøgde med innsatsen.

Klar for landsfinalen i Klassequizen

Her er laget frå Smøla før avreise til den nasjonale finalen i Klassequizen. F.v. Magnar Iversen, Ådne Johannes Myrvoll, Johan Eckhoff.

– Vi var ganske nervøse, det var vi, men vi gjorde vårt beste og er godt fornøgde.

Det seier Johan Eckhoff etter Klassequiz-finalen i Oslo.

Saman med Magnar Iversen og Ådne Johannes Myrvoll er Eckhoff ein del av trioen som gjekk sigrande ut av fylkesfinalen i Klassequizen.

Dei slo ein jentetrio frå Vanylven i Møre og Romsdal-finalen, noko som gjorde at dei gjekk vidare til landsfinalen i Oslo.

Saka held fram under bildet.

Smøla klassequizen

Jubelen stod i taket etter at Smøla-gutta hadde vunne Klassequizen for Møre og Romsdal.

Foto: Ivar Lid Riise / NRK

– Ei stor oppleving

Alle dei 19 fastlandsfylka i Noreg hadde lag med i landsfinalen, som blei sendt laurdag 19.55 på NRK1.

– Det var kjekt å møte og bli kjent med dei andre laga. Og så var det kjekt å få sjå kva nivå dei låg på, seier Eckhoff.

Landsfinalen i Klassequizen starta med innleiande finale.

– Det var ein del spørsmål vi hadde full kontroll på. Andre visste vi rett og slett ikkje, medan vi var usikre på nokre.

Til slutt enda Møre og Romsdal-laget på todelt fjerdeplass med 26 poeng. Laga som gjekk vidare, frå Sør-Trøndelag, Vestfold og Vest-Agder, hadde 28, 27 og 27 poeng.

– Er det eitt spørsmål det er spesielt ergerleg å ha bomma på når de var så nære?

– Nei, eigentleg ikkje. Det var kjekt å få vere med. Det var ei stor oppleving, slår Eckhoff fast.

Møtte kjendisar

I tillegg til Klassequiz-finale, med innspeling over to dagar, fekk Smøla-gjengen sjå NRK.

– Vi kom til NRK-huset ganske tidleg, og hadde lydprøver før innspelinga. Det tok kanskje tre timar. Etter opptak fekk vi ei omvising på NRK-huset.

– Og så møtte vi mange kjendisar, fortel Eckhoff.

Også lærar Marit Hopshaug fortel om ein svært fin tur, på alle måtar.

– Vi er kjempefornøgde med innsatsen. All ære til gutta som sette både Møre og Romsdal og Smøla på kartet.