No nærmar det seg den nasjonale finalen i kunnskapskonkurransen for 10. klasser over heile landet.
– Vi er veldig spent og gler oss, seier Magnar Iversen.
Han skal saman med Johan Eckhoff og Ådne Johannes Myrvoll forsvare Møre og Romsdal si ære i kampen mot dei andre fylka om ein siger i Klassequizen.
Onsdag drog Smølaværingane til Oslo for å gjere seg klar til landsfinalen som blir sendt på riksdekkjande TV i beste sendetid. Programmet blir sendt kl. 19.55 laurdag med programleiar Solveig Hareide.
– Vi er godt førebudd. No har vi lest oss opp, spelt quiz på mobilen og læraren vår har laga til ting vi bør vite om.
I Møre og Romsdal har 18 skular vore med i konkurransen. For ikkje lenge sidan kunne ein få med seg at Smøla trakk det lengste strået i fylkesfinalen mot Myklebust barne- og ungdomsskule frå Vanylven.
Saka held fram under biletet.
TV-stjerner for ein dag
Det blir ein stor TV-produksjon som møter finalistane. Dette er heilt nytt for gjengen frå Smøla.
– Det blir uvant, men klart det blir jo spanande og. Sjansen for å vinne er liten trur eg, men vi skal gjere vårt beste, seier han.
Gutane seier det er ei oppleving å berre vere med.
– Og om vi skulle stikke av med sigeren hadde det vore fole stas det, avsluttar Iversen.
Her kan du sjå reprise av heile finalen mellom Smøla og Myklebust.