Det var jakta på lukrative kamskjel som gjorde at den bulgarske dykkaren hoppa i havet utanfor Smøla ein haustdag for tre år sidan. Til saman var dei fem på arbeid. Berre fire kom frå det i live.
Den tidlegare daglege leiaren i Atlantic Strømøyvåg AS, der mannen arbeidde, er tiltalt for 12 brot på Arbeidsmiljølova. Han avviser at han har skuld for det som skjedde.
– Nei, han meiner han ikkje er juridisk ansvarleg for de rutinane som skulle vore etablert, seier forsvarar Olav Cecil Bowitz.
– Kven meiner han var ansvarleg?
– Det har han ikkje peika ut, han berre seier at det ikkje er han, seier Bowitz.
Men i retten hevda mannen i 50-åra at ansvaret ligg hos morselskapet Atlantic Discovery.
NRK har lagt fram påstanden for selskapet, men har ikkje lukkast å få nokon kommentar.
Mannen gjekk også langt i å seie at det var dykkarane sjølve som hadde ansvar for utstyr og rutinar.
Elleve sider lang tiltale
Det er nettopp kven som er ansvarleg for den alvorlege ulykka, som er hovudtema i saka.
Onsdag starta rettssaka mot den tidlegare daglege leiaren i Nordmøre tingrett. Dommaren starta med å lese opp ein elleve sider lang tiltale. Her kjem det fram at dykkinga blei gjennomført utan annan kartlegging av farar, risikovurderingar, planar og tiltak enn at kvar av dykkarane skulle gjennomføre to dykk kvar. Funksjonar som dykkeleiar, beredskapsdykkar eller loggførar var ikkje tydeleg peika ut, og det mangla dykkarline. Det var også feil på kommunikasjonsutstyret.
– Det er ei alvorleg sak, det er ein omfattande tiltalevedtak som også dreiar seg om omfattande brot på Arbeidsmiljølova og tryggleiksforeskrifter som er gitt i medhald av Arbeidsmiljølova, seier aktor Knut Meek Corneliussen.
Tidlegare i sommar blei to meddykkarar bøtlagde med 25 000 kroner kvar etter dødsulykka. No risikerer den tidlegare daglege leiaren inntil tre års fengsel.
- LES OGSÅ:
- LES OGSÅ:
Tre dødsulykker på seks år
Det er ikkje første gongen Atlantic Strømøyvåg er involvert i alvorlege ulykker. To gongar tidlegare har dykkarar omkome under jakt på kamskjeldykking.
Aktor ser ikkje bort frå at det bli gitt vekt når det skal fastsetjast straff.
– Det vil vi kome tilbake til i avsluttande prosedyre fredag, seier han.
Wenche Brandstad er forsvarar for enka og dei to borna som den bulgarske dykkaren lèt etter seg. I retten onsdag bad ho om erstatning for dei tre på tilsaman 375 000 kroner. Ho ønskjer ikkje å kommentere kravet overfor NRK.
Det er sett av tre dagar til rettssaka i Nordmøre tingrett. Torsdag og fredag skal arbeidskollegaer og representantar for politi og Arbeidstilsynet forklare seg.
- LES OGSÅ: