Robek-kommunen Gjemnes må spare pengar. I forslaget til budsjett frå rådmannen vil kommunen få til dette ved å legge ned Lysfabrikken, to barnehagar og eit dagsenter for eldre. Formannskapet går inn for rådmannen sitt forslag når det gjeld Lysfabrikken.
– Det er trist, seier John Terje Ranheim som har si faste base på lysfabrikken saman med gode kollegaer, mellom dei, kjærasten Tanja Anita Øren.
Les:
Engasjerer seg
Dei pårørande til dei tilsette ved Lysfabrikken finn seg ikkje i at tilbodet blir borte.
– Foreldra til desse er så slitne etter å ha arbeidd for borna sine så lenge at det er lett motstand, seier Jorun Solveig Ranheim som er syster til John Terje Ranheim.
– Først har dei kjempa knallhardt for å få eit tilbod til borna sine, og når kommunen no vil legge ned tilbodet, er det lett for dei å gi opp.
Sjå TV-reportasjen frå Lysfabrikken:
Brev til politikarane
Men ho er ei av dei som ikkje gir seg utan kamp. Dei pårørande har samla seg, og skrive brev til politikarane. Alle i formannskapet har fått brevet overlevert personleg, og med klar beskjed.
– Det blir ikkje godtatt at Gjemnes kommune går på svake grupper og legg ned Lysfabrikken. Vi godtar heller ikkje reduksjon av tilbodet, seier Jorun Solveig Ranheim til NRK.
I dag hadde Lysfabrikken besøk av borna frå ein av dei nedleggingstrua barnehagane i kommunen. Dei vil alle få vite kva framtid dei har på sjølvaste Luciadagen.
13. desember avgjer kommunestyret i Gjemnes korleis dei skal klare å få budsjettet sitt i balanse.