Onsdag førre veke stoppa all trafikk på ruta Festøy – Solavåg på grunn av ein øydelagt ferjelem. All trafikk vart difor flytta over til strekninga Hareid–Sulesund.
Men problemet var ikkje løyst av den grunn. For det var ikkje mogleg å setje inn ei ekstraferje på strekninga fordi ferjene i dei to rutene har ulike ferjelemmar.
- LES ÒG:
Må snakke saman
No meiner ferjeselskapa sjølv at dei snakka meir i lag, og med Statens vegvesen.
– Det går på å fortelje kvarandre kva materiell me har tilgjengeleg i dei områda me opererer i, seier driftsansvarleg i Tide Sjø Ronny Vågsholm til NRK.
Onsdagen førre veke var problemet at ferjene til Tide Sjø mellom Hareid–Sulesund har kort fall-lem, medan Fjord1 MRF sine ferjer på strekninga Festøy–Solavåg har lang fall-lem.
På Hareid er det i tillegg eit langt gjerde som skil gåande frå køyrande. Det gjer at ferjer med lang fall-lem ikkje kan gå inn til ferjeleiet.
Lovar betring
Administrerande direktør i Fjord1 MRF Anker Grøvdal, seier ferjeselskapa og Statens vegvesen burde gjort ein jobb her.
– Det er greitt å vere etterpåklok, men me burde nok i fellesskap ha tenkt på at me burde ha ferjekaiar som kan ta imot begge type ferjer, seier Grøvdal.
Statens vegvesen skal nå ta ein gjennomgang av alle ferjestrekningane i fylket for å sjå om enkle tiltak kan gjere det lettare å setje inn reserveferjer når det blir problem på eit samband.
Ronny Vågsholm i Tide Sjø, meiner dei kan gjere meir.
– Det er dei som må utarbeide spesifikasjonane i anbodet for å få det endå betre tilpassa, det handlar berre om standardisering, seier han.
Vil ta tid å bygge om kaiane
Å bygge om alle ferjeleier til å passe gamle og nye, store og små, smale og breie ferjer vil vere ein økonomisk krevjande jobb.
Anker Grøvdal i Fjord1 MRF meiner eit slikt arbeid vil ta tid.
– Ein kan ikkje løyse dette på kort sikt. Men, der ferjetypane er like i storleik trur eg ikkje det skal vere store kostnader ved å legge til rette for å bruke begge ferjetypane. Det handlar om å tenkje gjennom lure løysingar, så er eg trygg på at Statens vegvesen finn gode løysingar på dette, seier Grøvdal.