Pasientar i heile landet har fått beskjed om å ikkje møte opp på legevakta for å bli koronatesta med mindre det er avtalt, men på Myrvåg legesenter i Herøy skjedde nettopp dette.
– Pasienten gjekk truleg glipp av informasjonen som stod på døra ute og gjekk inn på venterommet, fortel ordførar i Herøy, Bjørn Prytz. Det var Vestlandsnytt som først omtalte saka.
Det er usikkert om pasienten er smitta, men uansett måtte legekontoret stenge for å desinfisere området personen hadde vore i.
Bjørn Prytz er ordførar i Herøy. Han ber alle fylgje instruksane til kommunen om å gjere avtale med legekontoret på førehand.
Foto: Arne Flatin / NRK– Det er beklageleg at vi kjem i slike situasjonar, seier Prytz. På heimesida til kommunen står det at to personar som var i lokala då pasienten kom inn, no må i karantene.
Ordføraren seier at dei må vurdere å låse dørene til legekontoret, dersom det viser seg at folk ikkje rettar seg etter informasjonen om å gjere avtale på førehand. Dei som får beskjed om at dei skal testast, skal møte opp utanfor bygget.
Så langt har ingen testa positivt på Koronasmitte i Herøy. Prytz håper at det skal halde fram slik.
I 21.30-tida måndag opplyste Herøy kommune om at legekontoret er klart til opning att.
