Marmor-ormen ved Atlanterhavsvegen er 35 tonn tung og 90 meter lang. Den ligg ytst i havgapet, som ein ekstra turistmagnet i eit av landets største turistmål. Foreløpig er det få som stopper for å sjå på ormen, for foreløpig manglar det skilting som kan guide turistane fram til rett plass.
– Det er vanskeleg å sjå kva det er, og eg kjem nok ikkje til å mase på mamma og pappa for at vi skal dra og sjå den, seier Martin Carlsson frå Sverige.
Unødig inngrep
Kanskje er ikkje dette målgruppa nasjonale turistvegar hadde i tankane då dei bestilte kunstverket, men dei har likevel ei meining om kunsten.
– Eg synest naturen er svært vakker slik den er, så det er ikkje nødvendig å sette ut noko menneskeskapt. Eg kjem nok ikkje til å dra for å sjå på den fortel Annalisa Lanza frå Italia.
Forsiktige tilbakemeldingar
Rett skal vere rett, nokre har vore innom ormen. Og medan lokalbefolkninga har vore krass i kritikken av kunstverket, har turistane gitt litt forsiktigare tilbakemeldingar.
– Dei kjem ikkje med så mange meiningar om den. Kanskje smiler dei berre og seier at dei har no vore der, fortel kafearbeidar ved Atlanterhavsvegen, Lina Bolli Aarskog.