Forsvarer: – Skulle aldri vore tatt ut tiltale

Forsvararen til den ukrainske bussjåføren, Erling Flisnes, retta kritikk mot påtalemakta då han starta si prosedyre i Sunnmøre tingrett fredag.

– Etterforskinga har vore sterkt prega av at tre politidistrikt (Ålesund, Kristiansund og Florø) har vore involvert, sa han.

Han meiner også at den avsluttande behandlinga av saka hadde vore prega av hastverk.

– Her blei det tatt ut tiltale og saka blir ført før Havarikommisjonen for vegtrafikk var ferdig med sin rapport om styresnekka på bussen og hendingsgangen under ulykka. Når påtalemakta vel å gjere det på denne måten så er det å be om frifinning for uaktsamt drap. Vi har i retten høyrt fleire som har påpeikt at rapporten ikkje er ferdig, sa Flisnes.

• Tar ut tiltale før rapport er klar

For streng reaksjon

Forsvararen meinte at den ukrainske bussjåføren har blitt alt for hardt behandla, og at mannen sitt opphav var noko av grunnen til at påtalemakta ønska ein streng reaksjon.

– Fordi det er ein utlending så køyrer ein på, og det reagerer eg på. Eg trur ikkje saka hadde blitt behandla før rapporten var klar dersom sjåføren var norsk, sa han.

Han kravde også at sjåføren måtte settast fri, og meiner at det aldri skulle vore tatt ut tiltale mot mannnen. I Noreg er det vanleg at straffedømde slepp fri når dei har sona over to tredjedelar av ei straff. Den tiltalte bussjåføren har allereie sona 87 av dei 120 dagane som aktor krev.

– Min klient sit ti dagar på overtid og bør sleppast fri. Eg tviler på at ein nordmann hadde blitt sittande så lenge i arresten, hevda han.

Aktor Magnus Engh Juel meiner derimot at dei ikkje har tatt ut tiltale for tidleg.

– No er det statsadvokaten som har tatt ut tiltale, men eg sluttar meg til den avgjerda, sa han.

• Les også: Aktor: – Må dømmast for uforsiktig køyring og aktlaust drap

– Ikkje skyldig

Flisnes meinte at mannen aldri burde vore tiltalt for uaktsamt drap, og bad om full frifinning for både uforsiktig køyring, aktlaust drap og erstatningskrava som var fremja mot mannen. Han vektla at Havarikommisjonen sin endelege rapport vil vere viktig for å kunne vurdere skuldspørsmålet.

– Dei skal undersøke om det var ei ibuande svakheit i styresnekka som gjorde at den blei øydelagt. I så fall kan han ikkje klandrast for dødsulykka, og det er eit sentralt punkt i denne saka.

– Det er ingen årsakssamanheng mellom eventuell aktløyse og dødsfølga. Hadde ikkje styresnekka blitt øydelagt hadde dødsulykka aldri skjedd, sa han.

Flisnes meinte også at det var mykje uvisse og delte meiningar om plasseringa av personbilen og bussen under samanstøyten, og at retten også måtte ta dette med i vurderinga si. Han vektla også at vegen ikkje var skilta, og at det difor hadde vore vanskeleg for bussjåføren å sjå den gradvise innsnevringa på vegen.

– I etterpåklokskapen kan ein sjølvsagt tenke at bussjåføren gjorde ei feilvurdering på vanskelege og skiftande vegforhold. Han køyrde på ei ukjent vegstrekning og trudde ei passering ville gå bra, det gjorde det dessverre ikkje. Men det er ingen årsakssamanheng mellom kollisjonen og dødsulykka, sa han.

Dommen i saka kjem neste fredag. Aktor Magnus Engh Juel har gått med på å sleppe fri den ukrainske bussjåføren ved dommens forkynning, uansett utfall, ettersom han allereie har sone 87 av dei 120 dagane som aktor har kravd.

– Årsaka til at han ikkje blir sleppt fri i dag er den same som kvifor han har sete i varetekt til no, nemleg frykta for at han skal reise heim, sa Juel.

Les alt om saka her: