Fleire reagerer kraftig på at dei to svømmebassenga i kommunen blir stengt frå mai til september. Svømmeklubben meiner at kommunen bryt offentlege reglar, men det er ikkje kultursjefen einig i.
– Vi har ikkje fått tilbakemeldingar på at denne avgjerda ikkje er haldbar. Vi må stenge på grunn av økonomien i kommunen, seier Hallstein Kurseth, kultursjef i kommunen.
Stenginga kan òg føre til nedlegging av den nystarta svømmeklubben, meiner leiinga i klubben.
– Vi synst at dette er forferdeleg. Vi håpa at vi kunne ha kurs i same perioden som skulane var opne, men det blir no ikkje mogeleg. Vi må no vurdere om vi kan fortsette, seier Kjartan Grebstad, leiar i SIL symjing.
Sesongen vert no mykje kortare enn ønska. Svømmeklubben har lange ventelister og stenginga vil gjere det vanskeleg for fleire å få bli med i klubben.
– Set sparing framfor tryggleik
Diana Overøye som er lærar ved Sykkylven ungdomsskule seier at ho må kutte ein del av undervisninga for å kome i mål før stenginga. Ho meiner at ungdommane mister viktig opplæring.
– Eg får ikkje tid til viktige delar av pensum. Elevane får ikkje lært livredning fordi bassenget stenger før sommarferien, seier læraren.
Ho meiner at kommunal sparing kan skape farlege situasjonar.
– Det å vere ein god svømmar har mykje med tryggleik å gjere. Vi som bur ved sjøen bør ha nok kunnskap om livredning i vatn, seier ho.