Karakteren Kjell «Kjellen» Bigset er ferjemannen som vart bussjåfør, då ferja han jobba på vart lagt ned. I dag besøkte han møtet der formannskapsrepresentantar frå heile Sunnmøre var samla for å diskutere det nye kommunekartet. Han likar slett ikkje tanken på at kommunane skal slå seg saman.
– Eg er folkets talerøyr og eg har fortalt politikarane korleis dette skal gjerast. Fasiten er at alt var mykje betre før, rasar Bigset.
Han meiner at kommunane skal få vere slik dei er i dag.
– Volda og Ørsta har slost sidan dinosaurane døydde ut. Dei vert aldri samde om noko og dersom dei skal slåast saman, vert det verdas største galehus, meiner revyfiguren.
Han meiner at innbyggjarane heller bør starte å produsere ungar, slik at dei får eit innbyggjartal på 15-20.000 kvar og slepp samanslåing.
Forarga på besøk hos NRK
På besøk hos NRK torsdag ytra «Kjellen» sterke meiningar om korleis det blir viss ein slår saman nabokommunane Ørsta og Volda.