Karakteren Kjell Kjellen Bigset har etter kvart blitt kjend i store delar av landet. Den illsinte ferjemannen, som vart bussjåfør fordi ferjesambandet vart lagt ned, har gjort stor suksess i sosiale medium. Tysdag vart musikkvideoen lansert, der Kjellen drar til Spania.
Sjølvsagt får han trøbbel i sikkerheitskontrollen på Vigra, og i Spania blir han dritings, får myggstikk, vert solbrent og kastar opp av sushien.
Det er bygdekomikaren Thomas Ryste som står bak karakteren. Frå starten har han brukt sosiale medium for å nå fram med sketsjane sine. Berre få timar etter at musikkvideoen vart publisert, har 90.000 sett den. Komikaren har 130.000 fylgjarar på Facebook.
– Det er valdsamt med delingar, det går den vegen vi håpa, seier Ryste. Videoen handlar om den klassiske nordmannen som drar til Syden og typiske blemmer dei gjer.
– Øla er så billeg i Spania at du kan drikke deg rik på ei lita veke, seier Ryste. Han har inngått eit samarbeid med komikar og musikar Ørjan Liavåg. I videoen nedanfor kan du sjå Kjellen lære Liavåg dansestega i musikkvideoen.