Arctic Swan fekk motorproblem seint tysdag 26. mars, og var på veg ut av russisk sone då dei vart teken inn til kontroll. Sidan har båten lege til kai i Murmansk.
– Når du skal ut av russisk sone så må du melde deg på eit sjekkpunkt, og då kan ein risikere og bli teken inn til grundigare kontroll. Det var det som skjedde her, seier Maråk.
Båten skal ha hatt med seg fisk som dei hadde fiska i norsk farvatn inn i russisk sone. Denne fangsten hadde ikkje blitt rapportert ved innsegling. Dette risikerer reiarlag og skipet bot for. I går, fredag var saka oppe til behandling i retten i Murmansk.
– Saka var oppe i ein domstol for å vurdere ei eventuell bot, men båten har ikkje drive ulovleg fiske, seier Maråk.
Båten fekk forlate Murmansk klokka 01.00 natt til laurdag, og er no framme i Kirkenes der den skal på reparasjon. Maråk opplyser at ingen lovbrot har blitt avdekt.
Takkar for hjelpa
Skipper om bord Arctic Swan, Gert Sandvik, takkar for all hjelpa dei har fått.
– Eg vil rette ein stor takk til Noregs generalkonsulat i Murmansk, for uvurderleg bistand under opphaldet i Murmansk, seier Sandvik.
FSB: – Ulovleg rekefiske
Trålane hadde vore på fiske i berre nokre få dagar då dei fekk motorproblem. Om bord i båten var eit mannskap på 17 personar.
– Desse skal ha takla situasjonen veldig bra, seier Maråk.
Tidlegare denne veka melde The Barents Observer at det russiske sikkerheitspolitiet FSB meinte at Arctic Swan hadde drive med ulovleg fiske i russisk farvatn og dermed braut reglane for russisk fiske.
Ifølgje The Barents Observer så skal Arctic Swan ha vore i gang med rekefiske ved Ajonovskijøyene, nær Fiskarhalvøya, då dei vart stoppa. Området ligg nær den russiske grensa i eit område som regelmessig blir nytta til militær aktivitet.
– Kjenner seg ikkje igjen
Det er ein versjon interesseorganisasjonen Fiskebåt, som uttalar seg på vegner av Remøy Rederi, ikkje kjenner seg igjen i.
– Fartøyet hadde lov til å fiske i russisk farvatn, sa Audun Maråk, administrerande direktør, til NRK onsdag.
Han meiner det heller er snakk om formalfeil.
– Eg vil understreke at eventuelle brot er meir av administrativ art enn lovbrot, seier Maråk.
Samstundes peikar han på behovet for betre dialog mellom norske og russiske myndigheiter.
– Under kontrollen vart skipper stilt spørsmål og presentert for eit regelverk som viser at det er behov for langt betre informasjonsutvikling. I dag er det russisk rulett for norske fiskarar å fiske norske kvotar i russiske farevatn, seier han.
Båten har fått løyve til å segle vidare, i påvente av dommen frå russiske myndigheiter om kva som faktisk har skjedd.
Reiar i Remøy, Einar Jan Remøy, har tidlegare uttalt at i den grad det er gjort ein formalfeil, så vil reiarlaget ta ansvar for det. Arctic Swan blir drifta frå Alta, men er eigd av Remøy Rederi på Sunnmøre.