Laurdag 25. juli 2015. I ei kyrkje i Haram kommune på Sunnmøre er det duka for bryllaup og ei fullsett kyrkje ventar på at seremonien skal starte.
Korpsmusikken byrjar å spele og den komande bruda beveger seg oppover kyrkjegolvet.
Etter eit lite stykke stoppar bruda opp og gir frå seg buketten til forlovaren. I bytte får ho ei fløyte, og før gjestane anar det akkompagnert ho og den komande ektemannen korpset. Ho på fløyte og han på tuba.
– Vi møttest gjennom musikken, og då var det berre naturleg at den var ein del av bryllaupet vårt, seier nygifte Gro Audveig Hagen.
- Les også:
– Korps er det fjerde barnet vårt
Gro Audveig Hagen og Torfinn Bjørnøy har spelt i same korps i 16 år.
Foto: Monica Elise VestreFor Gro Audveig Hagen og Torfinn Bjørnøy har musikken alltid vore ein raud tråd i forholdet deira.
Dei to har spelt saman i Vatne hornmusikk i 16 år, og for åtte år sidan utvikla vennskapet seg til noko meir.
– Det er som broren til Torfinn sa i bryllaupet; vi har fire barn, dei tre døtrene våre og hornmusikken, seier Audveig Hagen lattermild.
Dei to har organisert ein rekke konsertar og deltatt på mange konkurransar saman.
– Vi har hatt det veldig gøy og gjort mykje kjekt i lag opp igjennom åra, seier ho.
- Les også:
– Det vart dagens snakkis
Stykket var brudemarsj av Jan Magne Førde, med nokre endringar gjort av brudeparet. Under førebuingane til bryllaupet sat ekteparet å og høyrde på songen då dei bestemte seg for å overraske gjestane.
Då paret skulle gifte seg ville dei overraske gjestane med ein eigen brudemarsj.
Foto: Monica Elise Vestre– Vi hadde lyst å gjere noko spesielt for gjestane, og spurte korpset om dei kunne tenke seg å hjelpe oss. Dei sa sjølvsagt ja. Alle klarte å halde tett om det og det vart ei stor oppleving for gjestane, seier ho.
Men det vart også ei stor oppleving for brudeparet.
– Korpset spelte kjempefint og ingen spelte feil til trass for at det var litt nervar inne i bilete. Musikken er veldig viktig for oss så det vart ein perfekt dag, seier Audveig Hagen og smiler.
Ho fortel at tilbakemeldingane etter bryllaupsstuntet har vore gode.
– Dei har brukt ord som magisk, fint og rørande. Det var viktig for oss å ha vår eigen versjon av ein vigsel. Vi ville ha ei uhøgtideleg stemning, og det fekk vi. Dagen vart perfekt og det var dagens store snakkis, seier Audveig Hagen.
- Les også:
