Tek grep for å spare pengar ved sjukehusa

Gjennom pandemien blei Helse Møre og Romsdal eitt av helseføretaka i Noreg med kontroll på økonomien. Dei siste månadene har det dukka stadig oftare opp raude tal.

Og på bakgrunn av tala frå januar kimar no alarmklokkene. Denne månaden var underskotet i høve budsjettet på 25, 8 millionar kroner.

– Resultatet for januar er urovekkjande. Til styremøtet i mars skal det leggast fram ein konkretisert omstillingspakke knytt til budsjett og vidare drift i 2024, skriv direktør Olav Lødemel til styret.

Årsaka til dei økonomiske vanskane er både lågare inntekter og høgare kostnader. Mykje av dette har samanheng med førebuing til innføringa av Helseplattforma.

– Endringa av aktivitet kan langt på veg relaterast til uttak av personell knytt til opplæringa i Helseplattforma, skriv Lødemel.

– Tiltak med rask effekt

No tek direktøren grep. Han varslar at han alt frå mars vil innføre ein streng tilsetjings- og utlysingskontroll. Talet på årsverk skal ned, men det blir ikkje full tilsetjingsstopp. For sjukehusa vil heile tida ha behov for tilsette med rett kompetanse.

– Underskotet for januar synleggjer at det er heilt naudsynt å innføre tiltak som kan ha rask effekt. Samla årsverksforbruk må reduserast og skal ein få verknad tidleg i året ser eg det som naudsynt å endre rutinar for tilsetjingar frå no av, skriv Lødemel i sakspapira.

Effektivisering i klinikkane

Samstundes som direktøren no flyttar alle tilsetjingssaker opp på toppnivå i organisasjonen varslar han at det også blir rundar med omstillingar i klinikkane. Direktøren presiserer fleire gonger at talet på årsverk i Helse Møre og Romsdal må ned.

– Tala for januar viser at inngangshastigheita når det gjeld samla kostnadsnivå i 2024 er for høg i høve til gjeldande budsjettramme, skriv direktøren i papira som skal leggast fram for styret førstkomande onsdag.